الجمعة، 19 فبراير 2021

أنا آسف

أنا قايم من النوم عندي حبة أسف
لا مش زكام ولا برد
حبة أسف
أنا آسف
ليك
وليا
وللناس كلها
أنا آسف للكوكب
وللعالم
لمجرة درب التبانة
وللدنيا
آسف لنفسي على الأفكار الكتير
والمشاوير الاكتر
آسف على نفسي كل ما باكبر
أنا آسف لحضرتَك ولحضرتِك
وللموهوبين
والمكلومين
والمظلومين
واللي بيحسوا بالحاجة ضعفين حجمها
أنا آسف للأولاد اللي ماشافوش أهاليهم
وللأهالي اللي مشافوش نفسهم
ولا جابوا حاجة ليهم
أنا آسف للولاد المظلومة
وآسف على الأهالي الظالمة
أنا آسف ليك يا صاحبي على العبث
وآسف لكل اصحابي على كل اللي بيواجهوه
أنا آسف للي شافني داخل وقام وساب الكرسي
وآسف للي فضل قاعد لإنه مش مضطر
أنا آسف
على هذا الهراء
يا عزيزي