" س "
" س " جالساً في بطن أمه ، يسمع كل ما يحدث حوله ، ويقدر على تمييز كل شئ .
سمع أباه يقول :
- أنا جمعتكم اليوم .. لإختيار اسماً لإبني .
فقال في بطن أمه مسرعا :
- يا ستار يارب .
بعد أن انتهت المباركات و " ألف مبروك " و " يارب يطلع زي الحج الكبير " و " دكتور أو بشمهندز قد الدنيا ان شاء الله " .. بدأت الإقتراحات فكان عمه هو أول من بدأ قائلا :
- احنا عايزين اسم حلو كده يا جماعة .. مش عايزين نعقد الواد ..
ثم أكمل :
- أنا شخصياً هبدأ .. حمــــادة ؟؟ ايه رأيكم ؟؟
س : يا نهار .. كده مش عايز تعقدني ؟؟
بالإجماع لم يوافق أحد على هذا الإسم ، وصفهم له بإنه اسم ضد رغباتهم .. قال أبوه بالنيابة عن كل من في الجلسة :
- يا جماعة احنا عايزين اسم راجل .. اسم كده يحسسنا اننا جبنا راجل
قال خاله :
- صلاح الدين.. حلو ؟؟
س : صلاح الدين ؟؟ .. هو أنا رايح أحرر القدس يا خالي .. السكوت أحسن يا خالي .
فأجمعوا بإنه اسم جميل جداً .. ولكن اسم طويل " وطبعاً .. مش عايزين نعقد الواد "
فقال جده :
- أنا من رأيي .. يوسف .
س : يسلم فمك يا جدي .. هو ده الكلام .. اسم جميل والله
قال أبوه :
- يا بابا عايزين اسم يخلي الواد " صدع " كده .. يخليه راجل
س : هو أنتم جايبين نيفين ولا ايه ؟؟ أنا راااااااجل .. راااجل
قال ابن عمه :
- ايه رأيكم في " سهل " ؟؟ اسم جميل وله معنى
رد مسرعاً :
س : سهل ايه ؟؟ هو أنا امتحان ؟؟
أبوه : لا لا لا .. بلاش سهل .. احتماليات تريقة أصحابه عليه هتكون كتيرة
س : هو أنتم خليتو فيها تريقة .. حراام عليكم
قال ابن الخال :
- أنا من رأيي .. حذيفة
س : الله !!.. أنا يكون اسمي حذيفة ؟؟ أه بس لما أطلع بره هوريك يا اسمك ايه انت
فوافقوا جميعا على هذا الإسم بالإجماع .. اسم يعمل من الواد راجل ..
وبعد عشرين سنة ..
كان يجلس حذيفة ، ويحتسي كأساً من " الويسكي " في إحدى الديسكو تيكات ، ويرقص على نغمات خليعة .
علي هشام
ليست هناك تعليقات:
إرسال تعليق